Na ovogodišnjem literarnom natječaju Čakavčići pul Ronjgi 29 sudjelovali su učenici: Madlen Badurina Ruke, Ana Sučić  Za muku Isukrstovu i Luka Buš Muka Isusova. Lukin rad nagrađen je 2. nagradom u kategoriji od 5. do 8. razreda, a svi radovi i ove godine objavljeni su u zborniku Čakavčići pul Ronjgi 29.

    U Osnovnoj školi Rikard Katalinić Jeretov sinoć, 22. 11. 2023. godine u 18.30 održana je prigodna svečanost uručenja nagrada. Svečanosti je prisustvovao naš Luka i voditeljica, a Luka je poput svih nagrađenih učenika javno pročitao svoj svoj rad. Čestitamo Luki na 2. nagradi te Madlen i Ani na sudjelovanju odabranim radom.

   Donosimo dašak raspoloženja sa svečanosti te radove naših literaraca.

Fotogalerija

Za muku Isusovu

    Jenoga dana po letu šel sen već moju pranonu. Prišel sen kol nje jušto kada je prontevala obed, maneštru do biži špakane zes kobasicu.
    Posel sen se, popil sen soka i poćakulal zes nju, a onda kako i vavek, po dobroj staroj užance, zel sen mobitel v ruki. „Muko Isusova, Luka, ma ce to delas? Ce bubaš po ton? gjedala je i inkantala se kako mobitel sope, kako promenjuje kolori. Indroman je, sama zes sobu ganala: „ Muko Isusova, kan gre ovoh svet kada ovakova mala škatulica more sost i svetlit?“ Ja sen ju pital: „ Ma ce to Vi ćakulate, ce je ota muka Isusova da ju indroman spominjate? Ja se solo igran zes mobitelon, a vi spominjate muku Isusovu.“ Špjegala mi je da stari judi to tako receju kada vidiju neš ce nisu maj videli, oli kada se neš čudiju. Ja sen joj lepo rekel: „Ma nona, to ni nikakovo čudo, to je solo mobitel. “ Ponutila mi je obed, a ja sen joj lepo odgovoril: „Nona, za muku Isusovu ne vojin ja otu zelenu maneštru!“ Nasmela se, bahnula me i lepo pozdravila. 
     To je bil zadnji put da smo se videli. Malo pokle toga šla je kol Isusa koga je vavek zazivala i spominjala va svojih molitvicah. Još i deneska va ušijah čujen moju pranonu, ku sen sila štimal, kako mi govori: „Za muku Isusovu, Luka, pusti otoh mobitel!“ 

Ime i prezime učenika: Luka Buš
Razred: 8. b
 

Muka Isukrstova

    Sine moj, boli me duša kada te gjedan kako te peštaju, kako ti krunu glogovu stavjaju na glavu. Svaka tvoja kap kervi kako da mi zes serdca gre. Svaka tvoja kap pota peče me kako ožiguja na duše.Sve kako si rekel, tako i je. Nevinoga te na križ stavjaju. I ti melčiš. Ti niš ne govoriš. Ti na se zimješ sve gresi sveta. A ja sen tvoja mat. Boli me, ne bin otela plakat, ma ne moren. Glas bin pustila, vriskala bin, a ne smen. Znan da je vo tvoj deštin. Znan da ti je Otec tvoj nebeski tako zapovel. Forši ćeju judi već tvoju muku, tvoju žrtvu, tvoj put križa. Forši ćeju bit boji, razumet, pokajat se i učinit voh svet bojin. Padaš pod križon, kolena ti popušćaju, a ja ne znan kako pomoć.
   Ne moren, ne smen. Samo hodin za tobu. Znan da Otec nebeski gjeda na te. I on je, kako i ja na te sila ponosan. Znan da moraš imet velu forcu za zdurat sve vo. Ma svejeno je teško. A ja verujen če si rekel. Verujen da ćeš do mertvih uskrsnut. Verujen da ću te opet već. Samo neka ta muka fini, neka se udela če je zapisano.

Ime i prezime: Ana Sučić
Razred: 8.a
 

Ruke

Evo mi ruke,  
jedne i druge.
To su moje dve
fidane sluge.

S njimi saki posal delan:
pišen, hitan balun,
abracujen mater i oca
i sila drugog posla.

abracujen – zagrljaj, zagrliti
fidane – vjerne

Ime i prezime učenika: Madlen Badurina
Razred: 8.b